高雄大樹和山里的光電場，目前業者已經夆停止二期開發計畫，毋過山頭已經夆攄甲光光，風颱雨一落落來，塗糜就流入去抾水池內底，共排水管窒牢咧。水利局表示，有先挖水路加強洩水，也派廠商24點鐘監控；不而過地方講，這改雨水無濟就有山坪跙落來，水土保持猶需要閣改進。（新聞標題、導言及內文皆為台語文）
黃色的塗糜漿對臨時挖開的排水口一直流出來，大樹和山里的二期光電場，因為樹仔草仔全部去予光電廠商剉了了，規粒山頭賰一堆塗，這改風颱雨一落落來，塗糜漿就按呢流入來抾水池內底，雖罔光電廠商進前有埋暗管，水利局也事先挖水路鬥洩水，毋過排水管猶是予塗沙窒牢咧，里長講，佳哉這擺雨無蓋大，若無遮當時欲崩攏毋知。
大樹區和山里長 吳順治：「規个水若食滇的時陣，遮的塗是鬆的，全部攏挨落來矣，挨落來共水溝窒牢咧，就會成做一个窟仔；這个窟仔若去予崩去，就會像咱小林村按呢。」
立法委員 柯志恩：「有看著彼爿的擋塗牆嘛，著，無，伊到遮攏無做。到時陣若真正崩落來，遮就全部攏淹過來。」
水利局講，現場三个窟仔是抾水沉砂的功能，這擺攏有發揮效果，毋過其中一窟的水路窒咧造成塗漿流出來，這部份已經要求廠商改善，為著欲監控光電場的安全，in也有派人進駐和山里活動中心，因為二期計畫已經廢止，現在這个所在已經袂當閣設光電枋矣。
高雄市水利局主秘 張世傑：「未來水利局會加強要求案場廠商，恢復原底的植生、植被，降低咱的山坡地可能會受著大水雨沖割的影響。」
里長講，開發計畫廢止了後，地方干焦向望政府會當較緊咧，先將擋塗牆的部份做起來，閣沓沓仔來共樹仔草仔種轉來，還予里民一个安心的生活環境。
記者 許嘉茹 邱紹揚 高雄報導