八仙塵爆發生到今滿10冬，彼時攏總造成15个人死亡、超過400人輕重傷。10年過矣，對受害者來講，雖講是一世人的疼，日子也總是愛過。32歲的黃博煒，規身軀百分之90燒燙傷，跤佮手攏予人鋸掉。當時醫生認為伊活落去的機率無到10%，但是伊毋但堅強活落來，閣活出充滿希望的人生。（新聞標題、導言及內文皆為台語文）
32歲的黃博煒佇10冬前因為八仙塵爆，規身軀90%的燒燙傷，佇加護病房，醫生予伊兩條路做選擇，第一是跤佮手攏鋸掉、第二是放棄治療離開人世間。當時伊才22歲，想著家己閣有真濟夢想猶未完成，決定共跤佮手攏鋸掉，就算醫生講活落來的機率干焦10%，伊嘛想欲佮命運拚一下。
八仙塵爆受害者 黃博煒：「爸爸親喙共我問，想欲知影家己傷了按怎無，但是伊（爸爸）傳達予我的，頭一个選擇就是放棄急救。尾仔等我情緒較穩定了後，有共我講第二條路，就是跤佮手攏共鋸掉；毋過醫生彼當陣是講，就算我鋸掉我的四肢，活落來的機率大概只有5%到10%。」
黃博煒講佇2015年完成跤佮手的鋸掉手術了後，經過5年外的復健，過程伊真痛苦，也有想過欲放棄，毋過伊無願意看著爸母，為著伊閣再傷心流目屎，決定用正面的心態來面對。
八仙塵爆受害者 黃博煒：「若是我看著爸爸媽媽，愈來愈老的身驅的時陣，我就會有一點仔討厭家己，就是我是按怎猶未恢復的彼種感覺。」
新光醫院整形外科醫師 林煌基：「燒傷百分之90，毋是百分之90咧恐怖，是伊的組織，因為組織若深度壞死，無皮膚來重建遐爾深的空喙，家己是生袂起來。」
黃博煒的精神感動真濟人，就連10冬前共伊治療的醫生，嘛感覺這是奇蹟。如今伊電機系畢業，咧做和電腦文書相關的工課，有閒的時陣就四界去演講，用家己的例，閣成功靠假跤peh起去合歡山的經驗，鼓勵別人，樂觀面對人生。
記者 鄭亞宣 林郁凱 臺北報導