佇澎湖，有兩个愛澎湖嘛愛藝術的人：一位是已經80幾歲的退休老師呂坤翰，伊用採集褒歌的方式來記錄澎湖；另外一位是欲50歲、佇澎湖做研究的吳明翰。怹兩人因為有仝款的興趣，自按呢變好朋友；目前怹咧合作，一个負責創作、一个記錄，鬥陣出一本冊，號做《用褒歌講故事的人》。（新聞標題、導言及內文皆為台語文）
「西坪西溝是阮兜，厝後懸懸是山頭。」
這位咧唱相褒歌的是82歲的呂坤翰，伊自細漢佇澎湖大漢。伊講囡仔時澎湖無電視、無電火，上快樂的時陣就是阿母唱褒歌予伊聽，毋過因為無紀錄，這寡褒歌已經漸漸仔失傳。
澎湖褒歌創作者 呂坤翰：「較早彼是口傳，所以攏毋知啥人編的，所以人若走、過身矣、搬走，這塊島褒歌就斷掉矣。」
大漢了後伊來到臺灣本島做老師，生活真無閒。逐改轉去澎湖就發現會曉唱褒歌的人愈來愈少，規个島上就賰一个人會曉唱褒歌。所以伊退休、較有時間了後，就開始創作，對2002到今攏總創作1200條的相褒歌。
澎湖褒歌創作者 呂坤翰：「轉去的時陣發現講，這兩年島的人攏走了足濟的，會曉唱歌的人干焦一个老人。我落尾想講，我就退休矣，我攏有時間矣，我猶閣足有興趣的，不如我就家己來創作看覓。」
這改也和伊的好朋友吳明翰鬥陣出一本冊，予做《用褒歌講故事的人》。伊和吳明翰兩人差40歲，毋過兩人攏真佮意澎湖、佮意大海，一个寫褒歌、一个愛攝影，兩人鬥陣完成這本冊。
澎湖褒歌記錄者 吳明翰：「阮是想講如果咱若有一个機會合作，共你遮的作品內底精選出來，透過新的方法落去編，希望講澎湖的學生囡仔，閣重新來熟似爸爸媽媽，甚至是阿公阿媽，彼个年代定定咧唱的褒歌。」
為著欲共老師的相褒歌傳予後一代的囡仔知，這本冊毋但請台語老師做正確的台文翻譯，閣有華語的解說，連邊仔的英文解說攏是吳明翰親身落去翻。希望透過文字，共澎湖的聲音、澎湖的特色記錄落來。
記者 鄭亞宣 林郁凱 臺北報導