雖罔高鐵左營站是高鐵、臺鐵參捷運做伙，毋過高鐵佮捷運就無通道相接，誠無利便。交通部長陳世凱今仔日（6/4）去到左營站會勘，嘛宣佈高鐵左營站佮高雄捷運相接的通道，一定會做， 按算明（2026）年3月動工。（新聞標題、導言及內文皆為台語文）
民眾坐高鐵來到左營站，若是欲換捷運，因為兩爿無做相連的通道，都愛先起來2樓車頭大廳，閣行出來車頭外口，坐電扶梯落去地下坐捷運，按呢peh上peh落，若是行李閣有大包細包，對民眾來講是誠無利便。
民眾 林小姐：「應該看人吧，若是少年人可能就較無差；若是講著利便，應該是對濟歲人佮細漢囡仔，抑是講行李紮較濟的人，當然就會較利便。」
其實當初佇起高鐵左營站時，都有按算高捷的連通道空間，毋過因為高鐵先完工，捷運局一直無法度確定相連通道欲做按怎，所以才會無佮台鐵仝款同齊做好。交通部長陳世凱初四來左營站會勘也當場答應，高捷連通道一定會做，目前按算明年三月動工。
交通部長 陳世凱：「坐捷運直接來到高鐵站，就會當透過捷運下面的連通道，直接入來到高鐵站，毋免閣peh起去頂懸的樓層才閣peh落來。」
立法委員 許智傑：「部長親自宣佈，按算明年三月動工，未來對高雄有三大指標意義：第一帶動演唱會經濟效益；第二民眾盤車運輸加較方便；第三人潮疏散加較安全。」
未來工程會佇高鐵月台做電扶梯，對地下一樓迵去高捷車站，高鐵公司表示，因為會影響著高鐵的正常營運，每一座月台的施工時間有限，工期可能會拖到3年，目前猶閣佇咧規畫階段，會盡量來縮短工時。
記者 許嘉茹 邱紹揚 高雄報導