高雄摔大雨 大寮連2件車禍、佳哉無嚴重傷亡
發布時間：
更新時間：
高雄今仔日（6/2）早起摔大雨，毋但造成積水，落雨天視線bái，也傳出車禍。大寮地區就有兩2件，其中一台是輪仔趨去挵安全島，自按呢反車，另外一件是挵著路邊四台車。佳哉這兩層意外，人攏干焦輕傷。（新聞標題、導言及內文皆為台語文）
初二早起八點外，大寮區的鳳屏二路車輛誠濟，一台駛對屏東方向的白色轎車，疑似因為落雨天路面積水、趨輪，規台車就按呢挵對安全島來，落尾四輪翹上天，反佇咧安全島，另外倚晝時間佇大寮的拍鐵仔街嘛有一台烏色轎車，疑似嘛是受著落雨影響，規台車駛對路邊去，挵著四台車，上頭前的這台白色轎車，已經夆挵入去邊仔的弓焦園去。林園分局表示，兩件事故攏總造成八台車受損，駕駛攏無食酒，佳哉人攏干焦輕傷。
高雄市交大林園分隊小隊長 阮冠博：「詳細的肇事原因需要等待鑑定。林園分局提醒，最近天氣無好，駕駛人駛車的時陣愛注意路面的狀況，保持行車安全距離佮適當的車速，注意車前的狀況，確保行車安全。」
毋但大寮有車禍，佇岡山的竹圍社區活動中心頭前，水利局的汙水工程，當時施工單位暫時先將崁佇路面的鐵枋徙走，這台烏色轎車原底欲入去施工區的保養廠，駕駛嘛無細膩共車駛入去窟仔底，佳哉人無啥要緊。
高雄市水利局正工程司 陳俊宇：「經過現場施工人員通報岡山分局到現場做筆錄，猶閣有聯絡吊車，已經將車輛吊起來，佳哉這台車的駕駛無受傷。」
高雄氣象站表示，初二暗時到初三日時，高雄猶是有雨的天氣，提醒民眾，落雨天視線無好，無論騎車、駛車攏愛速度放慢，確保行車安全。
記者 許嘉茹 邱紹揚 高雄報導
唐嘉良/編輯
