發生佇北大國小外口的車禍，攏總造成3死、12傷。拜二早起，三峽國中和北大國小辦理安心宣導的講座，心理師強調，毋管是大人囡仔，攏應該避免重複看車禍的影像佮資訊，才袂造成過度警覺、驚惶，影響情緒穩定的狀況。（此則新聞標題、內文為臺語文。）
拜二早起有民眾佇學校附近的路口獻花、囥四秀仔向遮無辜的性命致意，5/19新北三峽北大國小外口發生嚴重的車禍，造成3死12傷，三峽國中和北大國小也佇拜二辦理安心宣導講座，新北市教育局表示，已經安排心理督導進駐學校，會針對學校導護人員佮受影響班級，提供情緒輔導，一直到學校安穩。
新北市政府教育局特殊教育科長曹孝元講：「由教育局調派專業輔導人員入去校園，針對受影響的師生進行團體抑是個人的關懷陪伴，依照學校師生實際需求去伸勼做調整，會持續到校園情況安定落來。」
這改的重大車禍，肇事責任猶袂理清，除了校園周邊交通安全議題閣再受著討論，心理師表示愛允準家己有情緒，毋過也提醒毋管是親目睭看著，或者是透過新聞、網路看著車禍狀況，攏應該避免重複看遮的資訊，若較嚴重頭殼內甚至會直直出現車禍畫面，也就是出現心理學講的「閃回」這款情緒現象，就愛特別注意。
諮商心理師公會全聯會理事黃柔嘉講：「可能會感覺講敢若閣轉去彼个現場彼个時間，所以感覺身體足緊張的、筋肉絚絚，暗時睏的時陣可能嘛會一直去想著彼畫面、現場彼聲音，可能會睏袂去、失眠，抑是講足早就醒起來。」
心理師建議，家長也通觀察囡仔咧過車路、坐車的情緒，若是有焦慮、會驚的狀況，應該更加愛避免傷過注意車禍相關訊息，共注意力囥佇原本的生活，若是觀察落來超過三個月心理狀況無改善，就建議尋求專業醫療的協助。