高雄林園蔣銅像欲拆 民代提鎮煞傳說望保留
發布時間：
更新時間：
高雄林園有一座蔣介石的銅像，最近國有財產署按照促進轉型正義條例，發文予公所，準備欲共拆掉。當地議員指出，銅像是為著欲壓制煞氣所設的，認為應該愛尊重地方、莫共拆。市長陳其邁表示，會尊重國會通過的法律，法律按怎規定，地方政府就配合執行。（新聞標題、導言及內文皆為台語文）
紅色的蔣介石銅像有將近兩樓懸，tshāi佇林園的林園北路已經三、四十年，因為遮是國有地，最近國有財產署發文予公所，準備欲按照促轉條例，共銅像徙走，因為地方傳說彼个所在是「鉸刀穴」，銅像是為著欲鎮煞，15都有議員要求市府，應該尊重地方的文化，袂當拆。市長表示，這是國會通過的法律，怹只會當配合執行。
高雄市議員 邱于軒：「蔣介石銅像都是佇懷念威權統治，伊用促轉條例第五條，伊要求確保自由民主的憲政秩序。我無反對自由民主，猶毋過請你愛尊重林園在地人的心聲、在地人的文化。」
高雄市長 陳其邁：「佮威權象徵的拆除，這兩个是無仝款的代誌。當然伊會有保護利益的比較，所以這个部份，咱猶是愛尊重國會通過的法律。」
蔣介石銅像到底拆毋拆，地方居民大多數攏無意見，有人是講頂懸有威權象徵的文字愛提掉，有文史工作者表示，講風水鎮煞傷神化，當初是因為路細條捷車禍才會來設銅像，雖罔事故率有降低，毋過伊認為毋是銅像的緣故。
地方文史工作者 戴健城：「我認為彼款（設銅像）攏是神話，上主要就是後來車路有楦闊，交通自然就改善矣。」
當地居民：「無意見。（按怎講？）因為遐也無礙著啊！」
高雄市林園區文賢里長 黃三源：「若是你認為這塊地愛拆掉，若按呢你就共這塊地，借予當地里長，抑是當地的社區來使用，按呢毋是閣較好？」
蔣介石銅像若是拆掉，後續有啥物做法，國有財產署按算19欲佇公所召開協調會，收集地方意見看法，紲落來才來處理。
記者 許嘉茹 邱紹揚 高雄報導
唐嘉良/編輯
