雙北世壯運拜六就欲開始，毋過煞有迷眾頁佇網路放假消息，講蔣萬安規定世壯運彼工，袂當紮臺灣國旗入場，煞會當紮中國國旗。警方佇9點鐘了後，掠著這位傳播假消息、姓黃的查埔人。（此則新聞標題、內文為臺語文。）
有民眾禮拜佇面冊公開貼文，講「蔣萬安重大宣布，世壯運運動會場內，袂當出現國旗，但是觀眾欲紮五星旗無問題 」，這篇貼文佇網路大量予人轉貼、揤讚的速度也真緊。對此，世壯運執委會也趕緊澄清，這是假消息，主辦單位無公布這款無影無跡的資訊。
雙北世壯運發言人郭音蘭講：「世壯運執行委員會佇遮嚴肅澄清，干焦佇比賽佮頒獎等，正式儀式場地內面袂當紮旗仔，觀眾席是無限制。」
臺北市刑事警察大隊，也佇貼文發出來的9點鐘了後，掠著49歲有偽造文書前科，姓黃的查埔人。警方發現伊長期經營面冊，伊的迷眾頁有11萬个迷眾，平常時攏會分享一寡政治相關的言論。這擺伊也承認，有貼這條無正確的資訊，最後警方也依照違反《社會秩序維護法》來移送法辦。
偵五隊副隊長蕭文儒表示：「這个迷眾頁是黃姓民眾經營，共伊問煞了後，會用(違反)社會秩序維護法第63條第1項第5款的規定，移送新北簡易庭處罰。」
世壯運是世界級的大型比賽。臺北市政府希望民眾會當共重點囥佇參賽者的表現，注重運動精神，莫牽涉著政治、選舉、宗教等等的議題。希望逐家佇5/17會當入場，替運動選手加油。主辦單位也強調這改的參賽選手，有15位超過90歲以上的序大，市府希望透過IN的精神，感染閣較濟人，鼓勵逐家活到老運動到老，愈活愈健康。