彰化大城鄉萬安宮有一个誠特別的廟婆，是對智利嫁來臺灣的羅美智，拗八卦符令、用台語收驚，逐項攏會曉。因為伊的翁婿早早就過往，羅美智一个人擔起飼囝的責任，今年嘛來得著鄉內模範母親的肯定。（此則新聞標題、內文為臺語文。）
真熟手咧拗八卦符令，甚至解籤詩、收驚逐項攏會曉，這位對智利嫁來臺灣大城鄉的羅美智，是當地信仰中心——萬安宮的廟婆，伊因為翁婿的關係接下廟婆的工課，寢頭來到遮，聽無台語是上大的問題。
萬安宮主委蔡崑彰講：「咱庄仔頭有一个（蔡福教）去行遠洋的，去熟似咱的美智小姐，就共娶轉來按呢，（蔡福教）來咱宮的接任廟公，前幾年仔無去，來才換美智做廟婆。
羅美智本人表示：「序大就講袂使講華語，愛講台語，無阮會聽無，我就『歹勢歹勢』，我足艱苦，逐家講話我攏聽無，看電視嘛仝款，我攏聽無，我就那聽、那寫、那講那學台語，佮囡仔學較緊，佮囡仔學台語較緊。」
羅美智閣表示，往過的廟埕足鬧熱，大人泡茶、囡仔tshit-thô，遮的人攏講台語，伊嘛發覺若有聽無的，問囡仔人、學台語是上緊的。羅美智嫁來臺灣了後，翁婿早早就過往，伊一个人擔起飼囝的責任，今年嘛得著鄉內模範母親的肯定。
彰化大城鄉公所秘書洪慶祿講：「伊（羅美智）誠辛苦，共這兩个囡仔飼大漢，今年經過咱村長的推薦，伊（羅美智）得著咱大城鄉民國114年的模範母親。」
羅美智則講：「佇臺灣36年，我攏無時間去tshit-thô，但是袂要緊，我想欲等囡仔娶某生囝，我想欲做阿媽，毋知影愛等偌久，但是我足佮意佇臺灣生活。」
羅美智佇臺灣生活三十外冬，伊真佮意臺灣的人情味，嘛真歡喜今年提著模範母親的肯定，但是羅美智也誠掛念佇智利的親人，向望日後有機會加轉去智利，因為臺灣佮智利，攏是in兜。