高雄市定民俗，4年一科的林園鳳芸宮媽祖海巡活動，4/10透早七點，20外隻漁船載海巡媽等神尊對中芸港出發，往臺南安平港海上巡香。廟方表示，這擺的巡境破紀錄有五工，而且也是頭一擺會佇安平港駐駕過暝，予閣較濟信眾有機會參加。（新聞標題、導言及內文皆為台語文）
廟方人員勻勻仔將媽祖鑾轎囥去船頂，進行安座，其他參與的神明也已經相紲上船矣，準備這科的海上巡香活動。
初十透早中芸漁港都鬧熱滾滾。四年一科的海上巡香，由海巡媽押陣，佇水僊尊王做先鋒船的tshuā領之下，載著眾神的漁船一一開出港，前往臺南安平進行會香活動。廟方表示，往過考慮著天氣佮水路的問題，會盡量共時間縮短，今年是破紀錄，活動攏總有五工，也是第一擺佇外位過暝。
鳳芸宮管委會總幹事 王偉旭：「臺南佮高雄的交情已經遮久矣，是按怎攏無機會，共遮媠的LED電火，留佇遐予臺南市民看？一直共咱邀請，所以咱佇這改就破紀錄，留佇臺南遐過一暝予怹看。」
經過跋桮選出來的20外隻漁船，逐隻攏妝甲媠噹噹，這船頂懸除了規定的竹尾仔、滿載旗以外，其他包括船身的LED電火猶閣有音響等等，攏是船長怹家己發揮創意妝娗的，雖然所有的開銷攏愛家己來，毋閣船長攏講，怹的用心無為著啥，干焦希望予閣較濟人看著高雄林園才有的媽祖海巡文化。
船長：「這是無規格矣，廟方嘛無要求阮愛按怎妝；阮只是想講，逐家用一寡仔心，共媽祖鬥鬧熱。」
船長：「海音館彼个所在，人潮誠濟矣。人若來看就會鬥宣傳出去，真正袂bái。猶閣有（漁船）排佇咧海音館頭前，真正矣，毋管是無人機抑是翕相，是特別媠。」
廟方表示，媽祖海巡船隊，沿途會接受岸邊信眾的朝拜，11早起會對臺南回程，轉來駐駕高雄港，到時會有祝壽大典以及各種的藝陣展演，邀請民眾做伙來感受這个無仝款的媽祖海巡文化。
記者 許嘉茹 邱紹揚 高雄報導