臺南10區明日9點開始 停水、減壓送水30點鐘

東區這間餐飲店業者提厝內的桶仔趕緊咧承水，因為若賣果汁無水，定著無法度做生理。抑若佇北區洗衫店業者嘛因應停水，半暝仔就提早來洗民眾送來的衫。嘛有濟濟人客趕緊來永康的頭毛店先予人洗頭，因為煞落臺南市10个行政區25透早9點起到26下晡3點，欲停水佮降水壓施工30點鐘，濟濟民眾講認為生活上加減無利便。

業者講：「阮這馬就水塔有水就罔做，無水的時就來歇睏。（記者問：所以明仔載拍算欲歇睏？）應該是，無水就愛歇睏，啊阮嘛愛留阮家己欲洗的(水)。」

業者講：「停水停電就是攏是會影響著民生，加減會(影響)啦。」

若臺南市學生人數前三濟的文元國小，也佇停水範圍內，學校提早通知學生25愛對厝內紮茶來，無，驚茶機仔無夠用。這擺會停水，是因為自來水公司配合國土管理署，推動河川治理佮排水箱涵改建，這項工程影響將近24萬戶，是臺南近年來罕見的大規模停水。

台灣自來水公司第六區管理處長張煥獎講：「規个停水的區域，每一个里攏有設取水桶，阮攏有配合里長選定的所在，閣有八台水車來巡迴補水，予民眾市民的無方便降到上低。」

自來水公司講，停水期間有設51个臨時供水站，欲隨時維持供水量，予民眾會使緊急取水，in嘛會定時監測各區里的供水情形，若有需求就會加派車來補。另外，in嘛呼籲民眾若有用水問題，會當敲24點鐘服務專線1910來詢問。