為著記念湯德章律師對臺南的付出，湯德章紀念協會今仔日舉辦追思會，現場除了在地鄉親，嘛有來自日本的貴賓專程來臺灣致敬。另外，這陣湯德章故居整修完成矣，協會希望透過這个空間，延續伊堅持正義佮人權的精神，予民眾閣較認捌這位歷史人物。（新聞標題、導言及內文皆為台語文）
透早濟濟民眾提花來到湯德章紀念公園，感念湯德章律師當年為臺南犧牲性命。三月十三，湯德章紀念協會舉辦追思會，湯德章的老爸出身佇日本熊本縣宇土市，故鄉市長tshuā團親身來參與，嘛有日本民眾為著感念湯德章特別對日本飛來遮致敬。
日本民眾：「坂井德章的老爸是日本熊本縣出世，坂井德章的故事佇日本嘛真有名，因為有小說佇遮出版，所以阮熊本縣的人攏足感動。我今仔日特別請假，對日本來參加這个活動。」
文史工作者 李文雄：「過去伊的奮鬥，伊彼款的精神，是這馬的少年人通學習的。人毋但有正義爾，你若無勇氣你嘛無法度犧牲家己，湯德章伊就是這種人。」
這間90冬的古厝是湯德章故居，本成塗跤攏是建築廢材，閣加上老舊會漏水。協會兩冬前開始拚勢募款，經過一年外的整修，這陣佇二二八事件78週年，紀念館重新對外公開。協會講，整修過程中拆落來的木材攏逐條編號，目的就是欲共遮恢復伊原底的面貌，共湯德章生活過的所在保存做歷史遺產。
湯德章紀念協會理事長 黃建龍：「恢復湯德章先生彼陣生活的樣態來修復，整個恢復湯德章佇遐開律師事務所，佮蹛佇遐起居的情形。」
湯德章孫女 湯雅清：「經過遮爾濟冬內底有一寡攏破損去，透過理事長、協會閣有理事的拍拚，才會使修復。」
目前若欲參觀紀念館，就愛注文登記。主辦單位講，這是一个反思歷史的所在，嘛希望予民眾了解湯德章堅持正義佮人權的精神。怹嘛講未來會邀請相關團體，做伙辦講座、展覽等活動，繼續傳承正義佮勇氣的價值。
記者 李晨宇 臺南採訪報導