228事件78週年 民團辦「共生音樂節」紀念
發布時間：
更新時間：
臺灣共生青年協會舉辦第13屆的「共生音樂節」，這陣少年人透過音樂、展覽等等的活動，予臺灣人重新思考228事件帶來的傷疼，希望後一代了解這段歷史，予過去的錯誤莫閣重演。（新聞標題、導言及內文皆為臺語文）
「著 著 你看覓
我無人惜也無人知」
樂團佇臺頂唱出來臺灣的母語。這个活動是由一陣少年人所舉辦的活動，號做「共生音樂節」，活動舉辦到今已經13冬矣。
第13屆共生音樂節總召 王家芃：「阮規个活動的主題是以『無聲的傷疼』為主。『無聲』這件代誌就點出，包括發生228事件的時，可能有一寡受難者的聲音無法度傳達出來，到這馬猶閣有足濟人並無聽著這寡傷疼，所以會是一个『無聲』的狀態。」
現場除了有音樂演出，閣有人權市仔、真人圖書館等等，吸引濟濟無仝年歲的民眾來參加，民眾講這幾冬政府對臺灣母語復振、轉型正義、弱勢族群等等的議題，愈來愈重視，這就是一種進步。
民眾：「我感覺這馬這幾冬少年人愈來愈濟，像阮家己是40幾歲，阮拄著20幾歲、30幾歲的人愈來愈濟，有的甚至是國中生抑是高中生。」
民眾：「我感覺至少這馬來講，店家愈來愈知影袂當用慶祝的態度去過228。逐家會沓沓仔知影這件代誌，伊毋是一个笑詼，嘛毋是一件足歡喜的代誌；伊有足濟足濟傷疼佇背後。」
228事件發生到今已經78冬矣，臺灣共生青年協會以當代的角度，重新整理228事件的傷痕，怹嘛希望228紀念日，傳達予後一代的毋是干焦放假爾爾，是會當予後一代的序細理解228背後的故事，看著猶未完全好勢的空喙，避免過去的錯誤佮悲劇閣發生。
記者 鄭亞宣 許猛捷 臺北報導
唐嘉良/編輯
