初九子時拜天公 糕餅店、天公廟透暝無歇睏
發布時間：
更新時間：
明仔載是正月初九天公生，今仔（2/5）下晡就有誠濟人去款拜天公的物件。因為拜天公是對初九的子時開始拜，糕餅店和天公廟，對初八開始就透暝攏無歇睏。（新聞標題、導言及內文皆為臺語文）
壽桃、紅龜粿、牽仔條排甲滿滿是，糕餅店也陸陸續續咧補貨，共供品款予齊全，準備迎接這个拜四、正月初九攢欲拜天公、來買的人客。對拜三下晡開始就有民眾來款物件，款甲一箱滇滇滇，準備赴11點子時去拜拜。
民眾：「（你買偌濟物件）1990箍。（你買啥物款物件）你去問怹就好矣。壽桃、麵龜、牽仔滿四界。」
為著欲祈求新的一年好運、平安、發財，現代拜天公的物件愈來愈多元，親像有發財金、糕仔求事業步步高升等等。糕餅店也表示，拜天公古早例，上基本需要攢的就是麵龜、牽仔條閣有紅圓這三項物件。
糕餅店頭家娘：「這是麵龜，就是長壽的意思，長壽龜嘛；（牽仔）這个錢啊，古早的錢，就是共錢紮轉去，就是拜天公按呢；這是圓滿的意思，團圓圓滿的意思。」
有一寡民眾佇拜三下晡就先來到松山奉天宮提早拜天公，松山奉天宮也表示，普通時仔拜拜上蓋代先拜的就是天公祖玉皇大帝，這是對古早農業社會就傳落來的，代表對天公祖的尊敬。
臺北松山奉天宮藝文組長 王河傳：「天公祖就是佇咱臺灣人的心目中就是講，你若是拜拜的人就知影講，這就是神界上大的。」
廟方表示，過去農業社會，較早的人拜天公上主要攏是追求規家伙仔平安順序，拜天公分做頂下桌，頂桌拜素的，若有臊的牲禮會囥下桌，對舊曆正月初九子時也就是拜三暗時11點就會使開始拜天公，天公廟和附近的糕餅店對拜三開始透暝無歇睏，廟方也提醒民眾拜天公這工愛講好話、避免對天公祖無尊敬。
記者 張佳倪 謝季潾 臺北報導
唐嘉良/編輯
