2025臺北燈節 主燈「福蛇豆豆」先佮眾人見面
發布時間：
更新時間：
台北燈節佇2/2開始，主燈「福蛇豆豆」已經tshāi佇中山堂。這改臺北市攏總佮17間宮廟合作，打造宮廟的燈海。臺北市政府嘛會佇2/9開始發放免費的鼓仔燈，送予民眾。（新聞標題、導言及內文皆為臺語文）
台語台記者 鄭亞宣：「來到中山堂會當看著一隻足鑠奅的蛇，伊是今年2025年，臺北的主燈『福蛇豆豆』，已經出來佮民眾見面矣。」
臺北燈節，佇舊曆正月初五起鼓，為期15工，這改閣有送免費的鼓仔燈「臺北小Q」欲予民眾，這是送鼓仔燈活動，停辦6年了後，閣重新恢復。
北市觀傳局觀光發展科科長 洪梅雲：「鼓仔燈佇2/9、2/10下晡2點，佇全市12个行政區限量發送；閣有2/9到2/12元宵節，逐工下晡兩點，佇臺北燈節中山堂廣場佮北門廣場2个服務台，限量發送。」
來到臺北慈祐宮，會當看著各種的花燈，除了有今年代表動物──「白蛇」，閣有今年上衝的運動羽毛球，和棒球衫，這攏是慈祐宮為著欲響應臺北燈節，呈現的作品。
松山慈祐宮董事長 陳玉峰：「阮本廟內面有大組花燈，也有傳統花燈，嘛有中學生和小學生的花燈。」
除了慈祐宮，這改臺北市政府，攏總有佮17間的宮廟合作，像城隍廟，有全臺北市上長的燈海；臺北市天后宮嘛有軁轎跤造型燈火；松山慈惠堂有牌樓燈組。艋舺龍山寺、臺北保安宮等等的廟，嘛有蛇年主題燈活動。臺北市政府和臺北市的廟寺，邀請逐家鬥陣享受過年過節的氣氛。
記者 鄭亞宣 許猛捷 臺北報導
唐嘉良/編輯
