迎接款年貨人陣 臺北迪化街1/11-1/27禁薰

這個月欲過年、臺北迪化街年貨大街有店家已經共年貨排滿滿，攢的量比平常時加出3倍，像香菇、烏魚子、干貝，來買年貨的人客真濟，頭家娘無閒咧收錢，伊講照過去的經驗，差不多對11拜六開始，迪化街逐工預估會有十萬外人來搬年貨。

店家講：「1/11開始才有人，開始人就足濟，一工差不多有十萬人。」

毋過往過攏會有人，反應講來迪化街採買年貨的民眾、捷會佇遮食薰空氣真䆀。為著欲予民眾，歡歡喜喜來搬年貨轉厝，臺北市政府公告，自1月11到27這段時間，規條迪化街攏禁止食薰，若無會開罰六千至一萬箍，另外為著欲方便採買民眾、也有免費的交通車通坐。

臺北市商業處處長江美玲講：「規个年貨大街期間攏禁薰的，阮嘛會有相關單位做一寡禁薰方面的稽查。」

今年是臺北迪化街年貨大街30周年，市府為著欲慶祝，這改有佮臺北市超過100間的店家合作，推出濟濟年節的活動佮好康的禮物，欲予民眾來到迪化街除了踅街採買、也通享受過年的鬧熱氣氛。