冬節大團圓 母語團體辦活動挲圓仔、講典故

「冬節圓，挲圓圓，圓圓趁大錢。」
那唱圓仔歌那跳舞，逐家攏笑甲真歡喜，嘛趁機會講冬節的故事、解說冬節是一年當中、日頭最短、暗暝上長的一日、予囡仔知。
除了唱歌跳舞、講台語故事，現場閣有挲圓仔活動，無論大人囡仔逐家攏耍甲笑咍咍。

參加民眾：「予(囡仔)體驗為啥物，這個節日愛挲圓仔，嘛予𪜶動手做，了按怎挲圓仔，予𪜶知影這款趣味。」
參加民眾：「予囡仔過臺灣的節日。」

新竹母語團體特別佇冬節，招逐家做伙來動手挲圓仔，另外閣煮鹹佮甜兩種無仝口味的圓仔予逐家食。

新竹母語囡仔窟成員Mono：「因為這馬社會較少這款傳統的物件，所以阮就想講會當用這活動，共這(挲圓仔)傳統的例，和一寡活動繼續傳落去，無若是咧厝內，嘛罕得有這(挲圓仔)的機會。」
民眾沈雪芳：「阮的傳統就是暗時，冬節進前一暗食鹹圓仔，隔工冬節彼早起就食甜圓仔。」

冬節團圓食冬節圓，食煞就加一歲，傳統佇這工也愛煮圓仔湯拜祖先、拜神明，「謝冬」感謝規年迵天的保庇。透透過活動、予囡仔那耍那綴咧講台語，也予逐家感受過節的氣氛。