一年一改、鬧熱滾滾的「艋舺大拜拜」——艋舺青山王文化祭，佇拜三（11/20）暗時登場矣，為期三工的「暗訪」儀式，予規个萬華地區鬧熱滾滾、人潮插插插。（此則新聞標題、導言、內文皆為臺語文。）
一年一改、鬧熱滾滾的「艋舺大拜拜」——艋舺青山王文化祭，佇拜三（11/20）暗時登場矣，為期三工的「暗訪」儀式，予規个萬華地區鬧熱滾滾、人潮插插插。
一句「起馬囉！」就是欲佮青山王稟報、準備欲出巡，會佇艋舺行透透。逐年舊曆10/23青山王做生日的時，廟方攏會舉辦「青山王祭典」，有扛轎的信眾講，因為青山王的靈聖保庇，伊對18歲開始已經扛11冬矣；嘛有信眾講，因為青山王，予伊娶著一个媠某。
艋舺青山宮建廟到今，已經有168冬的歷史矣，一直是艋舺當地重要的民間信仰。廟方表示，當初的建廟是因為1854年艋舺地區流行瘟疫，泉州惠安人趕緊共家鄉的神——青山王請來艋舺，後來青山王就成為專門化解瘟疫的神。
青山宮表示，逐冬青山王的暗訪儀式，會佇暗時遊行，是為著欲予青山王佇暗時替信眾掠妖魔鬼怪，保庇艋舺地區的興旺。為期三工的活動，佇拜三（11/20）開始鬧熱。今年廟方嘛特別恢復百年傳統，揣20台真人藝閣車來遊行，廟方粗步估計，逐日攏會有二萬至三萬人來參與。青山王祭是台北市三大廟會之一，也是台北市無形文化資產。