補冬食麻油雞、薑母鴨 中醫師：毋是逐人攏適合
發布時間：
更新時間：
今仔日（初7）是立冬，俗語講「立冬補冬，補喙空」，古早人認為經過一冬的辛苦，身體需要佇這工補元氣。毋過，中醫師欲來提醒逐家，食麻油雞、羊肉爐或者是薑母鴨，攏愛注意喔，毋是逐个人的體質攏適合食補。（新聞標題、導言及內文皆為臺語文）
燒滾滾芳貢貢的薑母鴨捀到桌頂，予人看了真想欲食，有袂少人攏會佇立冬、補冬這工選擇食羊肉爐、薑母鴨，抑是燒酒雞來補身體，有的民眾感覺食煞寒天就較袂驚寒。
民眾：「因為古早人的智慧，講這工食補身體較會好，寒天閣袂驚寒。」
針對補冬食補，有中醫師建議民眾，其實應該愛看家己是啥物體質，適合啥物款的食材，才袂食補最後害身體食苦。
中醫師 吳佩芸：「逐家定定看著的，攏是薑母鴨、燒酒雞、麻油雞等等。若是講一寡（身體）較會siān篤篤，家己感覺氣有較虛的人，會當用西洋參仔雞湯，這款較溫和的方式來食補；若是一寡氣血較虛的人，寒天跤手較會冷的人，會當用何首烏雞湯來食補。」
有人講身體較燥的人無適合食補，中醫師表示，身體燥會當佇四神湯內底加一寡漢藥材，嘛是一款真好的補冬方式。
中醫師 吳佩芸：「身體較燥的人無適合食補，毋過親像四神湯這種的，怹是會使食的。因為其實（四神湯）的補性較無遮爾強，顛倒是會當補養脾胃，予消化（系統）閣較好。親像淮山、茯苓、芡實以及蓮子，有的人若是佮意，會使閣添一寡薏仁增加口感。按呢的四神湯組合，其實嘛真適合現代人做補冬食補。」
佇補冬這工，新竹閣有愛心團體專工來到消防隊，攢好料來替辛苦救災的消防人員補冬，逐家是食甲身軀燒燒，心嘛感覺真溫暖。
記者 張君豪 新竹報導
唐嘉良/編輯
