凱米風颱已經過矣，南部菜蔬供貨量到今猶原袂穩定，價數嘛猶未落價，民眾去市場凊彩買幾項青菜就愛百外箍。高雄梓官農會主任表示講，目前真濟菜蔬猶當咧種，月底供應量才會回穩，這馬價數也已經漸漸仔咧落矣。（此則新聞標題、導言、內文皆為臺語文。）
下晡時仔，高雄內惟黃昏市場，濟濟民眾當咧揀菜欲轉去煮暗頓。風颱過後，菜價起到這馬猶未完全落價，親像小白菜、湯匙仔菜等等一把攏愛四五十箍，買菜的民眾表示講，菜蔬的價數確實攏有起，會儘量買起無遮爾濟的菜，業者嘛講，風颱過後，菜蔬價數確實起三四倍。
消費者講：「小白菜較貴，蕹菜較俗，高麗菜嘛較貴，懸一倍以上。」
菜攤頭家張先生講：「風颱前差不多3倍至4倍，出來做這做三十幾年，這斗是風害災害上嚴重的。」
高雄梓官菜蔬專區也是這擺風颱損蕩真嚴重的所在，這馬真濟田地猶無菜，愛等待復耕，到今梓官農會干焦收成蕹菜爾，產地一斤30外箍，抑若較驚淹水的小白菜佮湯匙仔菜佮油菜，一寡農民拍算欲等到月底才開始種，目前農會收的菜蔬的價數一斤愛50箍，算是中價。
高雄市梓官農會供銷部主任劉振華表示，「平均差不多佇50箍左右，蕹菜有較俗，蕹菜差不多佇30幾箍，若是價數平穩，到月底這段，應該咱的葉菜類會漸漸生產起來。」
主任表示講，菜蔬佇八月底的時陣，收成量才會漸漸回穩，袂影響著九月開學，學校營養午餐的供應，抑若菜蔬的價數，估計愛一個月的時間才會當全部回穩。