蔣渭水是台灣史內面重要的人物，伊的診所就佇咧大稻埕，有一位10年前對美國轉來臺灣、投入大稻埕文史復興工課的少年家仔-葉晏廷，為著唌少年人來認捌地方文史，共蔣渭水的故事改編做科幻故事，配合AI畫的圖做台語繪本，毋但了解蔣渭水、大稻埕，也聽著台語。（此則新聞標題、導言、內文皆為臺語文。）
「伊是醫生、伊是主角，這兩个是欲來協助伊，處理一寡較困難的代誌。」
日本bàng-gà畫風的醫生來回佇古早佮現代，閣有科幻的背景，兩邊有奇巧的生物陪伴，詳細看這篇故事的文字下面寫的是台語，這是大稻埕一位文史復興運動者葉晏廷出版的台語電子繪本。伊10年前對美國轉來台灣，投入家己厝內的米絞，以及大稻埕文史復興的工課。蔣渭水較早行醫的診所就佇大稻埕，這个繪本內面醫生的故事，靈感就是來自伊，但為著唌少年囡仔來認捌，才共改編做一个科幻故事。
繪本作者葉晏廷，「上早的時陣，逐家了解大稻埕，是對蔣渭水開始，一開始咧設計繪本的時陣，是欲予咱這馬的囡仔，去了解大稻埕歷史的文化，所以才考慮一寡，in會較有興趣的主題佮故事，落去設計繪本。」
因為是科幻的內容，所以葉晏廷是選擇用這馬上流行的生成式AI來畫圖。抑若文字配上台語，是因為伊認為，過去彼个時代的人，生活中就是用台語咧對話，所以真自然就選擇這个語言。
繪本作者葉晏廷，「佇大稻埕台語的發展，是對上早的時陣就開始，較早阮祖先佇遮做生意，in攏是講台語，咱這馬無咧使用，囡仔嘛無咧使用，所以咱就用較輕鬆的方式，望in會感覺講較有興趣，去學台語。」
葉晏廷講，這本繪本是伊第三本台語電子繪本，煞落來的計畫是每年攏出版一本和大稻埕文史有關係的台語繪本，望逐家做伙來用台語熟似大稻埕。