覆議案6/19-20審查、6/21表決 民團閣會集

台北市過晝開始落西北雨，立法院四摳圍的民眾攑雨傘、穿雨幔，繼續守咧現場。立法院拜三開始，審議行政院對國會改革法案的覆議案；舉辦青鳥行動，對法案有疑慮、支持覆議的民間團體，也閣再招民眾行上街頭，反對國會擴權的法條。

經濟民主連合副秘書長 許冠澤，「大部份的國人，當然攏支持國會改革，但是為啥有一半的國人，支持行政院的覆議案，代表這馬立法院通過的國會法案，毋是人民心中期待的國會改革，彼个是一个濫權法案，是一个會影響著咱個人的隱私，影響公司營業祕密的濫權法案，毋是一个好的改革。」

民間團體表示，這是一場街頭的公民課，這擺in佇青島東路、濟南路舞台，攏有邀請各領域專家學者、民團演講，對各層面討論民主議題。因為濟濟大學得欲開始歇熱，民間團體也招大學生、民眾到現場，上這个佇街頭舉辦的「夏季學校」。

參與行動的大學生游同學，「我本身是讀法律系，真濟體制外的行動，是會當學著較濟無仝的物件，無仝的學者有無仝的講法，就是會當聽著更加多元的聲音，毋是干焦佇學校課堂內面的內容」

參與行動的大學生 張同學，「我有聽著高中生講，這擺的立法程序敢若參公民課本內底，講的攏無仝，有人攏會講倡議無效果，但是我感覺是有用的，因為逐家鬥陣徛出來，參內底的人講，阮真正誠要意。」

國會職權法案、覆議案、立法院佇拜五會進行表決，除了青鳥行動，國民黨也發起「藍鷹行動」，號召支持這擺國會改革法案的民眾，佇青島東路的另外一頭表達訴求。就驚雙方人陣發生衝突，台北市警方拜五也估計會派500个警察佇現場維護安全、防止衝突發生。