濾心無鎖好勢 厝裝潢隨淹水、業者態度煞䆀

厝主轉去厝內，發現塗跤攏是水，毋但客廳，連廚房、房間全部攏有，水差不多有兩三公分深，毋過遮的水是對佗位來的，原來是廚房下跤的淨水機，因為業者的失覺察，致使規間厝攏淹水，厝主是清到半暝四五點。

當事者翁碧蓮，「共阮裝的師傅無欲承認是伊的問題，是毋是恁這棟大樓的水壓傷懸，我就講你愛來，伊講伊佇岡山足遠無法度來，附近揣一位伊的同事來，伊的同事來就看講，就是那當陣施工的師傅，無共濾心的第一道鎖邊仔鎖予好，足明顯是ﰀ的問題。」

翁小姐表示講，in開三百萬新裝潢的厝，才搬來兩工，17是請業者來換淨水器的濾心，想袂到師傅無共濾心鎖予絚，害水攏總漏六點鐘，毋但塗跤，連全新的家具、電器攏浸水，翁小姐不滿，第一時間通知業者，IN煞無欲承認，甚至主管到暗時十一點外才出現。

淨水器業者特助林國卿，「換濾心的時陣，無共濾心可能無用好勢的問題，實際抑是愛請第三方去看覓，阮第一時間一定先共環境用好勢，對昨昏下暗九點多到今一直咧處理。」

民眾，「一般抑是愛施工的廠商，就是換濾心的，抑是愛ﰀ來處理，工作嘛愛特別注意這方面。」

雖罔這馬厝主共厝內的水攏清掉矣，毋過塗跤三不五時抑是會出水，業者表示講，目前會請保險公司到現場鑑定，欲按怎來做賠償，未來也會加強人員的訓練。