兩廳院今年推出托育服務 家長安心欣賞表演

佇溫暖的空間，囡仔綴老師展開雙手、動雙跤，規身軀振動一下。兩廳院對今年開始提供照顧囡仔的服務，予愛看表演的家長，享受精彩演出的時，免去煩惱囡仔無人顧、無所在去。有遮貼心的服務，家長總算會當安心行入表演廳。

有囡仔的藝術工作者董怡芬，「阮定定tshuā囡仔去劇院，做伙看戲，有時陣感覺對伊真歹勢，因為對伊來講有淡薄仔辛苦，因為阮無一定攏tshuā伊看兒童劇，我總算會當佮伊講，咱欲鬥陣去劇院，伊有伊專屬的所在，我有我專屬的所在，咱咧參與藝術這个行為是仝步的。」

兩廳院表示，in發現真濟少年家長有囡仔了後，因為愛顧囡仔，就無方便行入劇場、音樂廳；兩廳院推出這个服務，毋但予家長安心看表演，囡仔是交予戲劇、幼教專業老師tshuā領，做一寡藝術啟發、振動身體的活動，囡仔仝款有囡仔人的藝術體驗。

國家兩廳院藝術總監劉怡汝，「25到40歲是阮主要的觀眾群，你會使想像這陣主要觀眾群，這个時陣毋是無閒咧飼囡仔，就是咧拚事業，阮感覺創作好勢閣安全的環境，予爸母佇欣賞藝術的時陣，會使安心、歡喜，我想這是咱這个劇場會當做的代誌。」

這个照顧囡仔的服務，每個月初一開放注文，會當注文後一個月的名額，目前是收4歲至8歲的囡仔，只要是看兩廳院園區的表演，家長就會當付費申請，一班上濟收10个囡仔。對年初開始提供服務到今，已經成功開8个班。兩廳院希望，愛看表演的家長，後擺就免閣因為煩惱囡仔無人顧，去放棄家己的興趣。