彰化同安寮十二庄請媽祖繞境 守護居民200年

滿車路的陣頭，一个接一个，準備欲去鹿港天后宮佮新祖宮恭請天上聖母，彰化縣同安寮十二庄請媽祖，逐年活動由十二庄十五个角頭，輪流辦理，到今已經有將近兩百年的歷史。

同安寮福安宮主委陳永聰表示：「同安寮福安宮阮是發起的宮廟，嘛是講早期的信仰中心，所以阮是永遠的副駕，尾仔有閣兩庄叫做小公館，咱若請媽祖就是佇小公館，兩工就是分別佇咱社尾慈安宮食中午，閣來就是咱埔鹽普安宮食中午。」

當時清朝先民來彰化福興參埔鹽開墾，沿用原鄉地名－同安，早年洘旱嚴重，農民歹種作，同安寮12庄，聯合請媽祖來庄內遶境求雨，紲後請媽祖的儀式就延續到今，其中世代相傳的大總理，這馬已經傳到第八代

同安寮十二庄請媽祖大總理陳有朋講：「到我遮這馬算是第八代，第八代欲兩百年囉，這嘛有教育的意義，一寡仔囡仔來參與信仰，來飲水思源。」
同安寮文化協會創會理事長陳鈴坤講：「傳統的陣頭算有需要恢復，因為較早12庄請媽祖，各庄其實攏有家己的陣頭，這馬時代無仝矣，陣頭攏請專業的。」

同安寮12庄請媽祖，2014年列做彰化縣無形文化資產，今年活動佇4月13、14兩工舉辦，同安寮文化協會嘛拍勢傳承獅陣、八音吹等等．望媽祖繞境結合傳統藝陣，予民俗文化會當代代湠。