白沙屯媽進香第五日 頭改行到林內鄉軍營

苗栗白沙屯媽祖進香已經進行到第五工，毋但一般民眾痟媽祖，軍警嘛攏真期待會當得著白沙屯媽祖的保庇和加持。白沙屯媽祖進香到今已經有200外年歷史，今年毋但是頭一改來到雲林林內鄉，嘛是頭一改來到軍營。

大埔營區砲兵部隊訓練中心指揮官，「本砲兵部隊訓練中心，誠心誠意奉請天上聖母來護持，予弟子、部隊、人員、車輛，出入平安順序、任務圓滿，會當繼續保護家園、保護國家。」

大埔營區的指揮官，用真輾轉的台語來祈求媽祖保庇，國軍也大聲喝口號。

「美麗家園，由我守護，媽祖讚，多謝國軍」

白沙屯媽祖上出名的就是進香的路線攏無固定，定會臨時行往家境辛苦的人兜停駕，也會去踅超市、店仔等等，濟濟信眾攏認為媽祖誠親切、有個性。台灣民俗專家溫宗翰表示，白沙屯媽祖上迷人的所在，其實就佇咧和信眾的互動，濟濟人會佇這个信仰的過程中間感覺受著媽祖的照顧。

台灣民俗專家 溫宗翰，「共咱生的人咱會號做媽，咱會叫伊媽，抑是講咱會叫伊母親，佇咧媽祖的信仰內底咱嘛是仝款，咱攏會叫伊媽祖婆 媽祖，伊會使幫助咱處理足濟工課，處理足濟代誌，綴白沙屯媽咧行，伊上重點咧看的其實攏是這種，媽祖佮信徒的互動，佇這內底去感受著媽祖慈悲的彼一面。」

專家表示咱定會共天上聖母，叫做媽、媽祖婆等等，其實就是共看做台灣人共同的母親，佇咱有苦難的時通得著伊的幫助，加上進香的過程時常有科學無法度解說的神蹟出現，這嘛是媽祖信仰佇台灣民間受歡迎的原因之一。