學甲香3日繞境拄著考試 「蜈蚣陣」揣無小仙童

街仔路看陣頭人洘秫秫，成做開路先鋒的蜈蚣陣慢慢徙振動，頂頭坐的攏是細漢仙童，沿路掖四秀仔逐家相爭來看。國定民俗「學甲上白礁」，每冬舊曆3月11舉辦，其中每四冬就會有連紲三工大踅境，不而過這擺蜈蚣陣煞有危機，主要因為這擺佇平日辦，閣加上搪著學校考試，就算廟方有提早參學校協調，猶是真欠人。

在地居民，「就若較歹育飼攏有啦，就較猴怪的啦，攏有的有人攏會予囡仔坐予勇壯啦。」

在地居民，「做生利所以我的囡仔攏無法度參加，無我真正足想欲予囡仔參加，地方的文化袂當失傳，愛一直堅持落去按呢。」

學甲慈濟宮總幹事李德欽，「拄好拄著彼段時間，毋過阮有事先攏已經有佮學校協調過，部份小朋友的問題就事先克服過矣。」

集和宮的蜈蚣陣是全國唯一用人工輪流落去扛的，由36个神童組成，三工攏總愛有108个囡仔才通順利出陣。有上百冬歷史的蜈蚣陣，相傳有驅邪鎮煞的作用，袂少民眾嘛會軁蜈蚣陣祈求消災解厄，坐往過蜈蚣陣有錢無底坐，這陣閣欠20幾个，予廟方IN頭殼☒咧燒。

學甲集和宮總幹事陳新悖，「本來囡仔攏報欲有矣，尾仔退欲一二十个掉，所以人變較無夠人，囡仔若五歲至十歲，體重就三十公斤以下，不管你佗一个鄉鎮，抑是佗一國攏會使來坐。」

毋過這改學甲香毋干焦蜈蚣陣真缺人爾，就連一寡文武陣、藝陣閣嘛攏揣無人來參加。廟方講，廟宇陣頭加減受著少囝化影響，IN只好拚勢四界揣囡仔來參加，向望共這項文化永續傳承。