這幾年為著栽培音樂劇的人才，臺北表演藝術中心就有一个培訓計畫，對拜五開始欲用音樂劇「來尬啦」的形式，予逐家看著培訓的成果。「來尬啦」這齣音樂劇，改編真濟經典的作品，親像勸世三姊妹、臺北大空襲、木蘭少女等等。導演講希望用多元的作品，予逐家看著十外年來臺灣在地的音樂劇親像花開滿山坪的成果。（此則新聞標題、導言、內文皆為臺語文。）
除了臺北無閃過的彼場空襲，「一九四五、五月三十，有刻印驚惶的日子(五月三十一)，阮這改欲用氣力去記，一九四五、五月三十一，一九四五、五月三十一。」
1945年5月31，是臺北大空襲的日子，是濟濟人已經袂記得的日子，這部音樂劇「台北大空襲」經過改編，今年編入去到「來尬啦」音樂劇內底，音樂執導康和祥向望會當予愈濟人了解台灣的故事。
音樂劇「來尬啦」編曲和音樂執導康和祥，「伊當初這个空襲是內底上嚴重的，就是想欲予逐家知影，咱其實有這段歷史，然後阮其實是用逐家做伙，閣開發的方式去做，去呈現這件事情。」
「來尬啦」今年邀請音樂劇創作者冉天豪、王希文、和康和祥同齊參與，運用怹3人的10部經典作品改編，連接無仝音樂來講無仝故事。導演講，伊家己誠受2007年音樂劇「四月望雨」的影響，向望用多元的作品，予逐家見證，這17年來台灣在地的音樂劇、花開滿山坪的發展。
音樂劇「來尬啦」導演曾慧誠，「多元是台灣的價值，所以我家己感覺，會當對家己土地佮生活內底，生出來的物件，無論伊的文化關係啥物，我感覺攏是一件值得咱去注意的代誌。」
這幾年為著栽培音樂劇的人才，臺北表演藝術中心有推出培訓計畫，佇音樂劇「來尬啦」內底，逐家就會當看著培訓的成果。這改的來尬啦，改編濟濟經典的音樂劇，除了台北大空襲、閣有「木蘭少女」，「勸世三姊妹」等等，按拜五開始到禮拜，佇臺北表演藝術中心演出，欲做一改予逐家看著台灣音樂劇的性命力。