228共生音樂節 用無仝形式tshuā民眾回顧歷史

共生音樂節的導覽人員佇現場，予逐家來回顧二二八。二二八事件到今年已經滿77年，為著欲予愈濟少年家了解這段歷史傷痕，共生青年協會辦「共生音樂節」已經12年，今年的主題是「傷痕的多聲道」，對母語繪本朗讀，介紹相關的文學、電影作品等等，來予逐家揣著家己和二二八的連結。

導覽，「阮就希望講，阮會當透過這款的展覽，就是會當提供逐家一个重新進入，抑是重新轉去到這段歷史的入口。」

台灣共生青年協會理事王有庠也講，「咱想欲予逐家去知影講，接觸歷史其實毋是一个，敢若足嚴肅的物件，其實咱會當用別的方式，去接觸這个歷史的事件。」

共生音樂節今年辦佇自由廣場，有濟濟少年家來踅，仝所在另外一爿，台灣國家聯盟嘛辦追思紀念會哀悼，邀請受難者家屬來講過去的遭遇，向望台灣人毋通袂記得歷史的教示，袂當予民主自由倒退攄。聯盟也要求政府應當趕緊落實轉型正義，和歷史的深化教育。

台灣國家聯盟總召集人吳樹民，「舊年咱咧舉辦228紀念活動的時陣，我發見講有60%的台灣人，毋捌有228事件，這是何等悲慘的歷史教育，我咧想咱台灣人著愛有一个自覺。」

無論是追思會抑是共生音樂節，仝款攏是徛佇歷史教育的角度，下晡有袂少家長ﰓ囡仔來參與共生音樂節，活動一直到下暗，陸續有樂團表演和演講，暗時8點嘛會有受難者的唱名儀式，希望予台灣人會記得遮的受難前輩的名。