文化部公佈重要的傳統表演藝術保存者，佇南管的領域，代表性人物是陳嬿朱老師，伊予人認定是南管音樂的保存者。陳嬿朱老師接觸南管已經有一甲子的時間，伊的演唱佮演奏攏誠有藝術性，咱做伙欣賞伊的表演。(本則新聞標題、導言、內文皆為臺語文)
那彈琵琶，那用南管特殊的泉州腔，唱出這條《共君斷約》，陳嬿朱老師，就是文化部認定南管音樂重要的保存者，陳嬿朱老師佇細漢時陣看電影，聽著南管音樂就有興趣，大漢拄著張鴻明老師，就開始學，到今已經60外冬啊，老師上厲害就是唱曲，愛提著拍板，是那唱那拍節奏，誠有傳統的韻味。
南管音樂保存者 陳嬿朱：「傳習指譜曲攏是愛大套，大套有當時仔真正足困難學，是非常珍貴，真正愛好好仔來保存。會當有接棒的人，會當有較少年的一代來連續落去」
南管音樂是台灣重要的傳統音樂，由唱曲的人提拍唱曲，琵琶領奏，攏總是五位表演者，老師講，南管音樂表演的位置也真講究，以唱曲的人為主，倒爿是洞簫佮二弦，正爿是琵琶佮三弦的表演者，演奏的過程中，咬字佮旋律的配合上重要。
南管音樂保存者 陳嬿朱：「南管一个字攏有當時仔牽誠長，若叫無清楚，人就毋知聽你咧唱啥貨，南管本身就是無蓋好學的物件」
陳嬿朱老師講，伊的恩師張鴻明老師，過去也登錄做為南管音樂的保存者，可惜張老師已經過身。陳嬿朱也成做文化部登錄的南管音樂唯一的保存者，這馬伊佇台南、高雄積極傳藝，向望南管音樂的媠，會當永續流傳。