歌仔音樂劇「1624」 以海洋史觀探臺灣身世

由兩位歌仔戲的天王孫翠鳳佮唐美雲，扮演四百年前的鄭芝龍佮荷蘭人，兩位王牌演對手戲，觀眾攏共拍噗仔，這齣1624歌仔戲音樂劇，是將荷蘭統治台灣發生的故事，用歌仔戲方式演出，初一佇高雄開記者會，其中精彩的片段是頭擺現光。

演員唐美雲，「所以毋管是1624，抑是到這馬2024經過這段期間，阮所看著的是，所有人這片土地頂面，留下真實的情感，流汗流血用性命，去保護這片土地。」

1624年，是台灣佮世界相拄的開始，佇這齣戲當中，彼當時毋但有荷蘭人佮漢人爾，閣有西拉雅人、日本人等，演員講，1624大型戶外的歌仔戲音樂劇，攏總有13个團體，台前幕後動員五百人演出，將四百冬前荷蘭佮台灣的連結，做全新的詮釋。

演員孫翠鳳，「1624會當講是，超級大大大型的戶外，而且是歌仔戲的音樂劇，這个佇歌仔戲的歷史內面，從來無過，所以是一个新的里程碑。」

文化部部長史哲，「應該是頭一擺用遮爾專業，而且大眾的表演藝術方法，來實現阮臺灣家己的歷史過程。」

這也是高雄中山堂整修以來，頭一組演出的戲劇，這齣1624歌仔戲音樂劇，按算24、25佇台南高鐵站演出，為台灣400年歷史起鼓。