科技是愈來愈進步，這馬閣會當和藝術結合，運用佇傳統布袋戲、音樂、生態等領域，目前當咧佇高雄市立美術館展覽，佮逐家分享科技佮藝術結合的成果。（此則新聞標題、導言、內文皆為臺語文。）
民眾坐佇椅仔，用目睭就會當操控電視頂的布袋戲尪仔，這是高雄美術館上新的科技展覽，是利用虛擬實境、人機互動等科技，民眾會當成做布袋戲大師，隨著時代變化，布袋戲文化面臨傳承挑戰，透過科技展現，予布袋戲佇未來有無仝的出路。
觀展者，「感覺布袋戲這个物件會有新的體驗，不比阮進前只會當佇下面看台戲，就是有一種參與感。」
這擺國科會佮高雄市立美術館合作，有三十外間的大專院校、企業協助，利用AI、VR、無人機等技術，親像民眾會當用手捒這塊的板塊，感受天災地動，邊仔的作品會連動做變化，抑是用手機仔掃條碼，掛特殊的目鏡，就會當知影作者想欲表達的理念。
觀展者，「我是感覺內底是足濟高科技，就是有足濟物件佮高科技做結合。」
策展人黃雅玲，「比如講VR、AR、AI技術，閣有互動技術，閣有影像辨識的技術、機器人手骨的技術、無人機的技術等等。」
這擺的展覽展到三月初三，攏總有九件計畫的作品，強調佮參觀者的互動，拍破往過傳統看展覽的經驗，予民眾全新無仝的體驗。