檢視總統辯論會 事實查核中心提供調查報告

2024總統、副總統候選人的政見發表會佮辯論會攏已經結束，辯論會的議題百百款，為著欲防止不實的消息影響選舉，嘛欲予民眾了解遮的政治人物講的話，敢是誠實的？台灣事實查核中心結合專家、學者佮記者，針對候選人引用的資料，去進行事實調查，發現三黨的總統候選人，猶是會揀對家己有利的部份去講爾爾。

台灣事實查核中心執行長邱家宜說明，「無中生有的攏較無這款情形，猶毋過伊就是講有片面事實，一部份是真的，毋過伊就是共講甲較膨風，對家己較有利，彼是定定有這款的情形，實在的政治文化是無簡單啦，毋過因為阮有佇遮咧顧，逐家就會較小心淡薄仔。」


民主國家的選舉，大大牽涉著對未來的發展，台灣事實查核中心表示，怹有設立選舉專區，除了針對辯論會有做查核，今年選戰期間，嘛有針對候選人的政見佮言論，刊出調查報告，網路攏看會著。目前雖然民眾對遮的查核報告猶無啥知影，毋過攏有正面的肯定。


民眾表示，「基本上就看逐个無仝立場的新聞頻道，閣去看一下按呢，我感覺有多方的平台當然是有幫助，當然這个平台提供的真實性，猶是愛去了解一下按呢。」

民眾也講，「一般政治人物的內容無完全是講，攏是正確的，但是有經過調查閣來予逐家知影，內容的真實面按呢是較好。」

台灣事實查核中心表示，紲來會閣共副總統辯論會的查核報告囥起去，提供的報告嘛願意接受全民的檢視和挑戰。怹向望講透過遮的內容，培養公民社會事實調查的意識，同齊來監督候選人，予臺灣的政治文化會當愈來愈好。