文化部第47屆金鼎獎特別貢獻獎頒予前衛出版社社長-林文欽，40年前伊成立前衛出版社，就是佇咧解嚴前後，臺灣反對運動誠興的年代，伊拍頭陣出版真濟臺灣本土意識的冊，社長-林文欽也是推動臺語出版的先鋒者。伊講伊有一个目標，就是希望透過出版，予臺灣會當培養出屬於臺灣人的精神佮氣質。（此則新聞標題、導言、內文皆為臺語文。）
前衛出版社社長林文欽：「警備總部的公文，查禁的公文」
前衛出版社社長林文欽手提當年予警備總部查禁的公文，伊佇1982年成立前衛出版社，當時是解嚴前後、臺灣反對運動誠興的年代，伊出版濟濟政治、歷史和臺語相關的冊，為臺灣主體意識拚一條出路，林文欽表示會號"前衛"是有左派、先鋒意義佇咧，伊講家己有一个戇膽，毋驚予國民黨政府查禁。
前衛出版社社長林文欽強調，「阮綴反對運動咧行，愛培養臺灣意識，希望講若有氣力我著愛盡量來做，有關推廣臺灣本土的物件。」
社長林文欽今年欲70歲，投入出版業已經有40幾年的歲月，伊是臺語出版的先鋒，比論早期有臺語研究的「王育德全集」、「台灣俗諺語典」等等。這幾年也發展翻譯文學，像講臺語版的「小王子」、「傲慢佮偏見」攏真搶市。佇前衛蹛10冬的主編鄭清鴻講，臺語冊佇市場一直攏真邊緣，這改社長會當提著金鼎獎特別貢獻獎，嘛算是為臺語冊，出一口氣。
前衛出版社主編鄭清鴻講，「社長毋管是做人或者是講編輯的技巧，其實攏佇咱做工課的過程當中，攏有誠濟牽教，所以我認為這其實是對咱，本土智識的處理佮編輯的技巧，是誠重要的傳承的一个過程。」
前衛出版社社長林文欽補充，「臺灣氣質你就包括講，除了人品以外，你佇文學 藝術等等方面的修養，才有法度表現出，你是一个有氣質的、優雅的、進步的臺灣人，這是我一直想欲做的。」
林文欽真注重臺語文的出版品，向望予逐家了解用臺語會當講萬事萬項。伊嘛講家己有一个較懸的目標，就是希望咱毋但愛有臺灣主體意識，嘛愛培養出臺灣精神佮氣質，遮的攏著有豐富的智識做基礎， 伊講前衛出版社嘛一直攏是以這个目標去拍拚。