邊境開放了後，國內愈來愈濟民眾會安排出國旅遊，旅行業品質保障協會嘛針對1月到3月的國外旅行團費用發佈記者會，予逐家了解明年旅遊的資訊，親像上濟人去的日本明年會起4-5成，另外逐家關注的中國旅遊，甚至起到1.5倍。（此則新聞標題、導言、內文皆為臺語文。）
自咱國邊境解禁了後，國外旅遊愈來愈興，尤其閣來寒假、新正期間濟濟人嘛會安排出國ﰣ迌。根據旅行業品質保障協會公佈的資料，像上濟民眾愛去的日本，明年1至3月的旅行團費用，和今年仝期比起來起40-50%，原因包括日本的飯店、機票、餐廳等等的成本攏起起來，雖罔日票匯率直直降，毋過比袂過各項成本起的程度。另外韓國嘛真濟人去，但是明年的團費，煞顛倒是比今年略仔降10%。
旅行業品質保障協會委員廖培沅講，「日票貶值，所以日本人去國外旅遊減少，大部份攏走對國內旅遊，所以講日本的飯店、交通、餐廳，咧坐交通工具攏真ﰕ，嘛造成咱國民去日本的團費夯懸。」
旅行業品質保障協會委員李道珩表示，「年初航班猶未完全恢復票價較懸，以目前韓國來講規个航班大概恢復8成以上，有新增加航空公司和新的航點入來，致使票價有略仔降10%左右，所以阮也反映佇咧團費頂頭。」
春天一月至三月國內天氣猶閣涼冷，協會指出咱國民眾去東南亞旅遊的需求增加，嘛因為航空公司旅行團票起價、加上搪著寒假佮過年，所以有起20%。另外，交通部月初有宣佈自3/1起，欲開放旅行團去中國旅遊。但是協會指出明年去中國的費用起真懸，比2019年加1.5倍。主要是因為兩岸的航點這馬賰13个，所以機位有限、價數嘛真貴。
旅行業品質保障協會監事會主席黃文卿講，「明年大概平均起1.5倍左右，疫情前機幫航點大概51个航點，目前為止大概是開放13个航點，重點猶是以大選了後，是毋是中國遊客會來臺灣，若是中國遊客來臺灣，整體航點線應該就會當快速增加，整體價數才有可能降低。」
根據這擺品保協會公佈的國外旅行團價數行情，東南亞、東北亞、佮歐美等等，大多數的航線攏是起價的，協會嘛提醒民眾因為第一季欲出國的人猶原真濟、機位有限，欲出國的人著愛冗早安排。