過去高雄林園湳仔地公園有誠特別的仙后海䖳，這款海䖳會用倒頭栽的方式泅水。最近佇臺南將軍的扇形鹽田也出現誠濟。臺南生態保育學會認為，主要是海流變化有關係。市政府也講會揣人去了解。（此則新聞標題、導言、內文皆為臺語文。）
沿岸邊行，真濟民眾提相機起來翕，毋知影水底到是啥物。詳細看水內古錐的生物倒頭栽優雅咧泅水，若親像一朵花，這號做倒頭水母，嘛有人叫伊是海中的舞者。往過若欲看，就愛走到高雄林園湳仔地公園。毋過這馬臺南將軍的觀光景點煞出現，連在地人嘛講透世人無看過。
在地居民陳麗秋說明，「阮蹛佇遮已經40偌冬，毋捌看過這个物件，伊真正足媠的呢。」
觀光旅客吳小姐，「足趣味的，我嘛毋捌看過這種水母，第一改看著倒吊的。」
觀光旅客顧先生，「主要是來看生命之樹，想袂到遮生態維護遮爾好。」
根據了解，這款水母佇日時攏會反倒頭曝日，來吸收日頭光。啊這擺哪會出現倒頭水母咧？臺南市生態保育學會認為這參海流變化有關係。市府嘛講，會邀請專家學者來會勘。
臺南市生態保育學會理事長邱仁武說明，「春夏左右攏會佇河口遐咧生湠，隨著東北季風咧行的時當加強的時，這馬就直直往南來徙所在。」
臺南市觀旅局觀光技術科科長陶國隆也補充，「將會通報中央濕地主管機關國家公園署，嘛會邀請生態專家來現場會勘。」
將軍扇形鹽田是國家重要的濕地之一，有豐富的生態不止仔好☒迌，目前水內除了有差不多手盤大的倒頭水母，嘛有五十摳細的水母囝。來參觀的民眾，看媠就好，毋通伸手落去摸，驚手中毒閣兼去共伊傷著。