臺南靈濟殿孤棚祭 鋪白布接老大公、好兄弟上岸

長長的白布對五公尺懸的孤棚，垂落來一路延伸到運河內，這號做魂路，是咧tshuā領老大公上岸。白布兩爿兼插香，就是欲邀請各路地好兄弟來領受供品。臺南靈濟殿舉辦孤棚祭，逐冬固定佇舊曆七月初九來舉辦，到今已有171冬的歷史。雖然有搭棚，毋過這佮其他地頭的搶孤完全無仝款。

靈濟殿主委何志章：「1853年阮庄仔內下願，所以自較早就無搶孤的儀式矣，這條布橋對海面運河底，牽引遮好兄弟仔起來。」

文史工作者吳明勳：「主要是咧祭祀這个老大公伯仔，來感謝著老大公伯仔當初的鬥相共。」


用四枝柱仔搭的棚，倚欲兩層樓懸。詳細看四角柱有綁豬隻佮蕹菜。廟方講，豬隻代表是大禮的意思，若囥蕹菜就希望好兄弟仔食了就通走毋通留戀。另外，孤棚頂嘛有民眾做的各種篙棧誠澎湃，甚至另一爿閣攢香腸豬來普渡。

臺灣藝術大學古蹟系教授邱彥貴說明，「清朝時代的南部物件祭品，攏是用疊的爾無篙棧，有篙棧是北部主要的，所以上重要的是講安平靈濟殿，可能是南臺灣唯一有篙棧的所在。」
 

民眾：「了解了後才發現原來臺南各所在的歷史，真濟攏是有脈絡的」

特有的孤棚祭儀式，廟方指出，上主要是飲水思源，感謝過去的先人為這塊土地拍拚佮付出，同時遮嘛表現出台灣人對in的敬重。