迎接大士爺文化祭 民團規畫導覽.辦桌宣傳食食

對民雄火車頭出發，打貓街坊文化協會的文化導覽，𤆬逐家行入去菜市仔，閣用辦桌的方式，紹介民雄的食食。

活動導覽人吳至鎧講：「逐年這个大士爺的下街，下街就是阮遮祭典的時陣，阮遮攏會辦桌，因為阮欲予愈濟人會當來認捌民雄遮的食食，所以這改是揣遮市仔的一寡，在地料理。」
參加民眾張先生也講：「今仔日按呢走一輾，按呢佇桌頂來食，我感覺就是透過食
來閣較了解民雄這爿店頭，食食風俗習慣按呢。」

舊曆七月21到七月23，是嘉義縣民雄的大士爺文化祭，在地的文化協會，會先規畫文化走讀的活動，希望逐家毋但只是來參加熱鬧的宗教活動，嘛會當認捌祭典背後的文化意義。

參加民眾王小姐感覺：「大士爺祭對民雄來講，會當講是一種代表的感覺，對民雄這个所在，市場閣有大士爺廟的歷史，有增加一寡認捌，感覺誠歡喜。」
打貓街坊文化協會企劃黃顯淨講：「比如講放水燈，阮會𤆬逐家按照實際放水燈的路線、𤆬逐家去看，這馬科儀是按怎來進行，在地彼當陣是咧做啥物代誌。」

逐年舊曆七月的大士爺文化祭是嘉義民雄重要的活動，文化協會指出，除了放水燈的儀式，猶閣有大士爺開眼、火化升天的導覽活動，最後閣會𤆬逐家去到一寡在地知名人士的故居，予大士爺文化祭的活動，加添民雄在地的歷史記持。