文化總會佮紙風車劇團的「台灣歐趴 文化繞境」活動，20號佇匈牙利布達佩斯的艾菲爾劇場，進行頭一場「哪吒鬧龍宮」的演出，逐家是誠呵咾，場面真鬧熱。（此則新聞標題、導言、內文皆為臺語文。）
演員熱情參觀眾互動，逐家看了紙風車劇團佮文化總會的「哪吒鬧龍宮」戲齣了後，滿面攏是歡喜的笑容。這擺台灣到匈牙利的演出行動，就是希望通透過分享自由台灣的文化，予世界了解台灣。
駐匈牙利台北代表處大使劉世忠表示：「熟似臺灣文化的美麗佮多元、佮豐富，這是阮上主要的目的。」
除了台灣駐匈牙利代表團出席，也有來自匈牙利政治界、學術界這寡重要人物參與。濟濟現場匈牙利政治代表攏認為，透過文化認捌台灣，是兩國之間真好的交流基礎；也有匈牙利政治人物佇現場，對台灣自由的環境展現支持。
匈牙利前文化部長Gábor Fodor表示：「因為中國是臺灣周邊真大的危險，咱的文化交流真重要，因為咱知影自由的模樣佮感受。」
匈牙利綠黨(LMP)前主席/現任國會議員 Kanász-Nagy Máté表示：「我個人認為我所屬的綠黨，非常支持臺灣獨立，因為臺灣是自由民主的國家，除了這以外，阮非常支持臺灣通做國際組織的成員，譬如講WHO，也是阮非常支持，希望臺灣未來通達成這个夢想。」
台灣駐匈牙利大使劉世忠講，台灣未來猶有濟濟文化外交通推行，毋管是親像這擺戲劇類型的演出，抑是音樂等等領域的文化交流；代表處佇在地也有管道咧推行，攏歡迎各界通來遮，做伙拚文化外交。