電動機車業者拜會基隆談合作 市府:當咧評估

市府內底這台電動機車，時速會當催到100公里。有廠商拜會基隆市長謝國樑，參詳電動機車的合作。
基隆市長 謝國樑：「這个廠牌佮這个型號，會列入青年電動機車方案型號之一。」
市長表示，這擺除了車型的部份，也商談未來愛建置夠額的充電站等等。最近也有其他廠商來協談，目前預算猶是一台車4萬。有業者表示，除了eMoving這台白牌車，目前別的牌子就算綠牌車，成本也大概攏超過4萬。有符合資格的民眾咧想，敢有可能家己貼錢，加一寡選擇？
民眾：「我感覺Gogoro猶是會選擇較大眾，毋過性能若是袂䆀，一般學生應該是會使的。」
基隆市長 謝國樑：「阮這馬就是幫市民拍拚省錢，為啥閣愛予伊加納錢，阮就是愛設定予伊通免費提著，為啥一定愛加開錢。」
為著兌現選前政策，市府表示，希望議會通支持年中的追加減預算，年底先拚一萬台電動機車。只要78年次到92年次入籍滿三冬，提著駕照滿一冬，就有汰舊換新的機會，毋過也有基隆市民進黨議員張之豪表示，基隆市民上需要的敢是電動機車?望市府好好思考錢愛開佇佗位。