政治檔案內容受掩崁 民團呼籲修法愛緊通過
鄭雅文 林郁凱 / 台北報導
發布時間：
更新時間：
目次
228事件就欲滿76週年，臺灣民間真相佮和解促進會，今仔日(2/26)召開記者會，呼籲立法院趕緊通過「政治檔案條例」的修正草案，通好公開威權的加害人，澈底來推動轉型正義。
以228事件檔案彙編做例，台灣民間真相佮和解促進會指出仝款的檔案，這馬的內容煞比過去閣較無透明，正義敢真正有咧轉型?
真促會理事 吳俊瑩表示：「因為政治檔案條例實施後，情治單位心內底的警鐘出現，共過去交出來的檔案，全部翻頭閣檢查，閣提供予民眾的時，就變成這款情形」
學者蘇慶軒也以家己進前欲申請前民進黨主席許信良予人監控的檔案做例，講內底親像官員、檢舉人等等的資料也攏予崁牢咧，認為損害外界知的權利，目前閣佇法院上訴，IN認為被害者知影真相的權利是目前轉型正義上迫切愛做的。
真促會理事長 陳嘉銘表示：「政治偵防的工課參保家衛國的情資，其實是兩件代誌，但是這馬情資單位，就是共情工法應用佇政治檔案頂懸，致使咱無法度去讀已經，其實早就解密的檔案」
真促會表示，這馬有九成的政治檔案，攏受著掩崁，呼籲立法院的政治檔案條例修法愛趕緊通過，另外，若拄著政治檔案有爭議，檔案局應該召開公正第三人組成審議會議，國發會是回應，會透過法制完備，推動轉型工課。
鄭雅存/編輯
