新竹市棒球場挖著廢電線 今決定鑽塗肉體檢
張君豪／新竹報導
發布時間：
更新時間：
目次
開12億所起的新竹棒球場，進前佇塗肉內底，挖出電線等等的物件。新竹市府今仔日又閣成立體檢小組，揣土木專家、建築師等等，先共棒球場鑽塗肉，看塗跤有啥物物件。
新竹市政府成立新竹棒球場體檢小組。成員有大學土木系的教授、建築師、專家等等，針對棒球場塗肉的問題，目前初步決定袂全面挖開，會用另外一款方式，用鑽探(TSǸG-thàm)的方式，來了解塗跤有啥物物件。
新竹市副市長蔡麗清表示：「透過全面體檢，阮才會當知影，缺失的規模 到底有偌大。」
台大土木工程系教授李鴻源表示：「（鑽探）所提到塗肉的粒徑級配，其實就會當真清楚，下跤到底埋啥物貨，敢有照當初的規範去設計。」
新竹棒球場的爭議，對去年底九合一選舉的時陣至今，已經一段時間，民進黨新竹市議員認為，新的市長高虹安有點出152項缺失，目前有9成，已經改善完成，要求市府應該趕緊予棒球場重新啟用。
民進黨新竹市議員劉康彥表示：「9成以上缺失攏已經改善完成，只賰最後4項，高虹安煞無去對外講實際的狀況。」
新竹市副市長蔡麗清表示：「毋是一擺去發見152項，其實是陸續去發現，到這馬目前為止 統計出來的數量，當然有一部分已經陸續完成改善，毋過阮紲落閣有發見其他的問題。」
外界關心新竹棒球場、到底當時才會當啟用、辦比賽?新竹市政府強調講，想欲進行比賽，上重要的條件是球員佇遮拍球是安全的，紲落來愛看鑽探tsǹg-thàm的結果，所以棒球場當時會當啟用?目前無時間表。
陳玟芯/編輯
專題｜改造地獄路 台灣行人路為何難行？
