竹崎客家園區改長照中心 望改善醫療護鄉民

嘉義縣竹崎鄉鹿滿客家文化創意園區,主要保存竹崎鄉鹿滿客家聚落文化,為著欲予這个園區的空間,會當符合在地序大對長照的需求,竹崎鄉公所共園區內底兩棟倉庫改建做多功能服務中心,閣配合病院欲來推動日照中心,整合附近鄉鎮的醫療資源。

鄉公所佇新完工的服務中心頭進來謝土,這爿原本是竹崎鹿滿客家文化創意園區的拋荒的倉庫,經過420工的整修,未來會成做日間長照中心。
 

竹崎鄉民沈小姐講:「攏誠好,空氣好閣通光,所在閣闊誠方便,我就講我以後可能就會來。」

竹崎鄉公所指出,客家文化創意園區徛佇竹崎鄉的中心,這馬共服務中心起起來,序大日時有所在通去,嘛會當共醫療資源閣搝入來內山。

竹崎鄉長曾亮哲講:「灣橋榮民病院來共阮鬥輔導、鬥管理,我相信這佇阮竹崎鄉,對遮的長者來講是非常非常好的日常生活。」臺中榮總灣橋分院護理部副主任張蘭英也講:「有一寡序大對疾病的智識有想欲知影阮有這項服務,予阮的醫生走入來日照中心,免予序大閣愛去病院來詢問。」

竹崎鄉65歲的序大欲倚7600人,佔竹崎鄉人口的22%,序大欲揣病院攏會拄著交通的問題,新的服務中心啟用,毋但替偏鄉增加長照據點,嘛共閒置的空間轉做照顧鄉民的所在。

相關新聞