12/3全國語文競賽 今年增加本土語文劇場比賽

全國語文競賽今年佇新竹舉辦,這馬本土語言毋但有情境式演說,這回本土語言的部分,也有增加本土語文劇場的比賽,咱做伙來看。

一年一改的全國語文競賽,12月初就欲佇新竹市起鼓,總共吸引2437个選手報名參加,今年為著欲提升本土語文教學的生活化,比賽項目特別增加本土語文劇場比賽,希望學生結合劇場表演,予語文更加趣味。

教育部終身教育司司長 李毓娟表示:「(較早)是台灣區國語文競賽,當初是推廣華語,這馬隨時代進步,阮共本土語言,台語、客語、原住民語,攏加入比賽項目,來提升多元的語言能力佮學習興趣」

本土語言毋但是台灣人的母語,閣較應該是逐家平常時生活內底的語言,欲按怎推廣母語本土化,成做目前上重要的目標。

新竹市副市長 李世珍講:「以文會友比懸低,激發出上好的成績,希望佇十二月初三、初四,每一个參賽者來到新竹,除了得著好成績,嘛希望逐家來一逝文青之旅,來體會新竹這个少年的古城」

主辦單位教育部除了希望透過語文競賽,予學生對家己的母語更加重視,嘛打造出閣較好的校園本土語文學習環境。

相關新聞