辜公亮文教基金會，主辦李寶春導演的「京崑戲說長生殿」，明仔載就欲佇國家戲劇院演出。這回結合京戲、崑曲佮西洋樂器，共唐朝的愛情故事重新編排。
唐明皇佮楊貴妃的故事，一直攏是戲台頂上熱門的話題之一。辜公亮文教基金會推出「京崑戲說長生殿」，這回結合京戲、崑曲佮西洋樂器，將唐朝的愛情故事重新編排。第一擺演出楊貴妃啉酒醉的孔玥慈，認為這款的創作，予伊感覺不止仔速配
女主角孔玥慈表示：「其實京崑無分家，但是阮嘛真少有這款的方式，我第一改聽著這段的時陣，其實我非常驚疑，因為我想袂到伊會當配合甲遮爾好。」
將西洋樂器囥入去中國傳統戲曲內底，演員按怎唱、樂器按怎配合，攏是真大的學問，辜公亮文教基金會表示，一齣戲欲好看，愛有新的步數，才會當唌閣較濟人。
辜公亮文教基金會公關部經理黃麗宇表示：「一方面為著推廣，一方面會當予大眾，對無仝面向欣賞京戲，會當講是打造一个東方的音樂劇，予逐家會當閣較輕鬆，閣較完整去欣賞這齣長生殿。」
「京崑戲說長生殿」11月初5就欲佇臺北國家戲劇院演出，12月17-18嘛會去到臺中的國家歌劇院佮逐家見面。