臺灣美食展起鼓 日本福島食品.農漁產嘛參展

「起身歡迎我們的蔡英文總統！」
總統蔡英文參加台北美食展，講著疫情轉和，逐家咧恢復正常生活，話頭一轉，伊批評中國的威脅。
總統 蔡英文表示：「對昨昏開始，中國佇咱周邊進行實彈射擊演習，這是無負責任的做法，阮已經嚴正要求中國理性自制。」
呼籲國人放心保持冷靜，也表示當咧評估國境開放的時程，爭取國際旅客來台。與會的交通部長王國材強調欲替業者創造商機，講悠遊國旅已經有15萬人出團，也希望將美食展捒到國際上。
這改展覽有真濟台灣、日本、穆斯林的食品，其中日本美食館，進前禁止進口11冬的福島等縣食品攏出現，親像當地梅仔做成的春紅麗梅酒等等，民眾攏來試食體驗。
福島美食策劃人 倪筱涵表示：「這改來其實也有淡薄仔驚逐家有疑慮，所以阮也想欲聽人客的意見，阮也會希望假使有疑慮，阮會當共阮的故事，抑是阮有檢測報告，予ﰀ做伙看。」
業者透過活動來試水溫，因為今年２月政府宣布開放的時，閣有真濟無仝的意見，包括標示愛閣較清楚、進口了後的輻射檢驗能量佮設備敢有夠額等等，遮的問題敢已經攏解決、市場敢會當接受，著閣等待考驗。