外籍移工申訴搪阻礙 質疑相關部門分工不明

台灣國際勞工協會佮勞權團體,今仔日陪31个菲律賓移工到高雄市政府頭前抗議,外籍移工表示in申訴勞資爭議,拄著無公平的處理方式,嘛質疑勞工局佮楠梓加工出口區,對勞資爭議處理分工無清楚。勞工局回應講,這个案件是加工區管理處咧調查,雙方分工無清楚的問題,會閣向中央反映。

這31个外籍移工,攏是楠梓加工區楠梓電子的員工,in四月捌向勞工局申訴,雇主欠加班費,予in的薪水單無英文,閣有膳宿費稅款等等的問題,毋過勞工局共案件轉予無翻譯人員的加工區管理處,規个過程in感覺真無公平。

申訴移工 Richelle指出:「請莫共阮的案件當做球踼來踼去,阮需要的是幫助,毋是無公平的評斷。阮共一切攏共恁講,毋但干焦一个工人受害,是有三十一个工人」

台灣國際勞工協會專員 吳靜如表示:「明明知影按呢回覆,無充分調查,甚至毋捌相關法令規定,阮欲問勞工局就恬恬毋出聲,對其他主管機關的違法解釋,勞工局就看袂著」

台灣國際勞工協會指出,根據雇主聘僱外國人的管理辦法規定,予外國人工資,愛用雙語的薪水單,in嘛質疑,勞工局佮加工區管理處是按怎分工。

高雄市勞工局勞資關係科長 許文瓊表示:「咱目前佮經濟部加工區有一个分工,法令上確實有分工,這馬分工講無明確,抑是無蓋好勢的所在,會後會向相關部會做反映」

經濟部加工出口區管理處組長 徐仲禮講:「第一、有救濟方式,行政機關做調解,另外上新勞動法規規定,會當到法院提調解」

勞工局表示,因為這个案件的勞務提供所在屬於加工區管轄,落尾加工區調查認為,楠梓電子干焦加班超過46點鐘有違法,其他項目攏無違法,若是合約問題,移工會當閣申請調解。

全台敬老金大調查

相關新聞