氣象局:9縣市高溫特報 雙北.花東衝38度高溫

因為透西南風,大台北地區和花蓮縱谷這幾工攏會較翕,溫度會衝到38度以上。抑若是東南部,是會剾火燒風。所以特別提醒,有慢性病、汗流較袂出來、無法度排體內燒氣的民眾、閣有老大人,攏會較𠢕著痧,甚至是衰竭昏去,中晝就較莫出門、加食寡茶。。

日頭赤焱焱,透中晝,台北市市區溫度來到36度,大安區永康街排隊食冰的人,是排甲長躼躼。氣象局表示17、18兩工,受西南風影響,北台灣高溫35至37度,其他地區高溫大約32至34度,尤其大台北地區和花蓮縱谷,有機會來到38度極端高溫。

中央氣象局預報員 林定宜表示,「拜一進前攏是受西南風的影響,透早到早起中南部地區會有局部短暫陣雨,過晝中南部地區和各山區愛細膩有短陣雨和雷公雨。」

氣象局表示,東南部因為西南風沉降,愛注意火燒風,禮拜日過晝,各山區發生局部大雨的機會會較大,拜二開始,受太平洋高壓影響過晝雨就會較恬,毋過未來一禮拜天氣會持續燒熱,醫師提醒熱傷害照嚴重程度主要分做4種,挽筋、昏倒、衰竭、著痧,主要是出傷濟汗、去熱著血路袂順、身體無力欠水份,或者是長期佇日頭跤做穡攏是原因。

中醫師 吳明珠表示,「風的出入口攏較會著這痧,所以你共剾予開,伊會感覺人較爽快,較袂昏去。」

除了剾風池、風府,醫師表示也通針對大椎小可仔剾一下,不過提醒要揣專業人士,力頭愛節,而且莫剾超過15分。

中醫師 吳明珠表示,「雖然講天氣足熱的,咱也袂建議講食了傷冰。這寒氣就按呢入來、濕氣也入來,結果你人就會閣較虛弱。」

醫生也提醒,慢性病、年歲較大、出汗功能本底就較䆀的,愛避免中晝出門,運動前莫食血壓、神經或者是抗組織胺的藥仔,較袂脫水、頭殼眩,穿插愛較輕鬆、補充水份。

全台敬老金大調查

相關新聞