南部唯一龍船賽 陳其邁主持點眼.抗疫求平安

疫情滾絞,嘉義、臺南佮屏東攏宣佈取消今年的龍船比賽,高雄這馬成做南部唯一照常舉辦的縣市,今仔日市府佇愛河,照古禮為龍船點眼,祈求平安。市長陳其邁表示,會用高規格防疫來保護選手。

毛毛仔雨中,24隻龍船由市長陳其邁佮貴賓,照古禮開光點眼,嘛祈求風調雨順,疫情趕緊過去,其實這禮拜高雄確診人數一直增加,南部其他縣市已經陸續宣布無欲辦龍船比賽,干焦賰高雄決定照常。

高雄市長 陳其邁表示:「扒龍船是戶外的活動,風險會較低,有高規格防疫,包括愛注滿三劑,比賽彼工快篩陰性」

運發局表示,因為南部其他縣市停辦,高雄今年有袂少其他縣市的選手參加,攏總108隊,2200人報名,雖然南部疫情緊張,目前猶無報名了後臨時取消的隊伍。

高雄市運動發展局長 侯尊堯指出:「目前報名人數仝款是兩千兩百左右,人數毋是歷年上濟的,也是受著疫情影」

高雄肉粽節龍船比賽已經停辦兩冬矣,今年六月初三到初五佇愛河舉辦,市府表示,台北、新北嘛照辦。In會共選手佮觀眾分流,只要防疫做予好勢,日常節日活動就會當照常。

全台敬老金大調查

相關新聞