新竹民眾欲培墓 公墓煞予人亂抨大量廢棄物

後個月就是清明,民眾攏開始去培墓。毋過新竹的湖口公墓,煞發生予人偷倒規堆的裝潢廢棄物,甚至閣放火燒過,民眾看著是氣掣掣。

看到祖墳頭前出現遮濟糞埽,民眾氣甲強欲講袂出話,新竹縣湖口公墓最近發現,有人佇遮偷抨大量的糞埽,其中大部份是辦公室的裝潢廢棄物。

民眾表示:「欲來培墓整理祖墳的時陣,發現有遮爾可惡的人,共遮濟廢棄物倒佇遮,真正有夠受氣,嘛感覺有夠失德」

新竹縣議員 羅美文指出:「毋但一台車載過來,應該有十台以上,真正是有夠可惡,而且閣佇人的祖墳頭前擲糞埽,又閣放火燒」

環保局已經派人到現場稽查,嘛有處理部份的糞埽,尾後會配合警方調查資料,掠出偷倒的人。

新竹縣環保副局長 羅仕臣表示:「紲後需要做清除的部份,是按照警方參環保局調查,敢有相關的證據來處理。針對落尾的部份,欲針對行為人抑是地主,做後續的處置」

警方目前針對附近的監視器進行追查,希望掠出到底是啥人遮爾好大膽。

相關新聞

專題|全台敬老金大調查